پاکستان تحریک انصاف کے سیکریٹری جنرل سلمان اکرم راجہ نے کہا ہے کہ موجودہ حکومت آئینی ترامیم نہیں کر سکتی کیونکہ اس کے پاس نمبر پورے نہیں ہیں۔ ہم کچھ دیر بعد سپریم کورٹ میں درخواست دائر کر رہے ہیں۔ انہوں نے اپنے بیان میں کہا کہ اگر مجوزہ ترامیم منظور ہو گئیں تو سپریم کورٹ وفاقی آئینی عدالت کے ماتحت آ جائے گی اور اس کے پاس ترامیم کو رد کرنے کا کوئی اختیار نہیں رہے گا۔ آئینی ترامیم کا مقصد قوم کے عقائد کی ترجمانی کرنا ہوتا ہے، نہ کہ محکوم عدلیہ کے ذریعے جمہوریت کو نیچا دکھانے کی کوشش کرنا۔ لیکن ہم دیکھ رہے ہیں کہ آئین کے ساتھ دھوکہ کیا جا رہا ہے اور افسوس کہ کچھ جج اس فراڈ کو خوشی خوشی قبول کر لیں گے۔ ہم اپنی تاریخ کے سیاہ ترین دور سے گزر رہے ہیں۔
انہوں نے یہ بھی کہا کہ قاضی فائز عیسٰی کی مدت ملازمت میں توسیع کے لیے تحریک انصاف کے ممبران کی ماؤں، بیٹیوں اور بہنوں کو اٹھایا جا رہا ہے۔ ہم نے کبھی سوچا بھی نہیں تھا کہ نظام اتنی اخلاقی پستی میں گر جائے گا، اور وہ بھی صرف ایک توسیع کے لیے۔ قاضی فائز عیسیٰ کی توسیع کے لیے ہمارے ایم این ایز کو دھمکایا جا رہا ہے اور انہیں توڑنے کی کوششیں کی جا رہی ہیں، مگر اللہ کا شکر ہے کہ ہمارے ایم این ایز ثابت قدم ہیں۔ ان کو ڈرا دھمکا کر ہمارے ساتھ ملانے کی کوششیں ناکام ہو رہی ہیں اور نمبر پورے نہیں ہو سکتے۔
بیرسٹر سلمان اکرم راجہ نے کہا کہ امید ہے مولانا فضل الرحمان آئین کے ساتھ کھڑے ہوں گے اور وہ نہیں چاہیں گے کہ پانچ میں سے ایک جج وزیراعظم منتخب کرنا شروع کردے، کیونکہ بدقسمتی سے عہدے کی لالچ کسی کو بھی آزاد نہیں رہنے دیتی۔ ان ترامیم کے بعد ججز آزاد فیصلے نہیں کریں گے بلکہ صرف اگلا چیف جسٹس بننے کے لیے وزیراعظم کی پسندیدہ فہرست میں شامل ہونا چاہیں گے۔
