6ویں آئینی ترمیم کا اصل مقصد عدالتی خودمختاری کو ایگزیکٹو کے ماتحت لانا تھا، عمران خان کی قیادت میں ملک میں آئین وقانون کی بالادستی کو ہر صورت بحال کریں گے۔ مرکزی رہنماء پی ٹی آئی اسد قیصر
اسلام آباد پاکستان تحریک انصاف کے مرکزی رہنما اسد قیصر نے ایک بار پھر ریاستی پالیسیوں پر سوال اٹھا دیے ہیں۔ ان کا کہنا ہے کہ جو لوگ پارٹی سے علیحدہ ہو کر میڈیا کے سامنے آئے، انہیں 9 مئی کے کیسز میں بخش دیا گیا، جبکہ وہ کارکنان جو پارٹی کے ساتھ وفادار رہے، انہیں انسداد دہشتگردی عدالتوں سے سخت سزائیں دی جا رہی ہیں — یہ رویہ انصاف کے متضاد معیار کی کھلی علامت ہے۔ اسد قیصر نے اپنے ایکس (سابقہ ٹوئٹر) پیغام میں ڈاکٹر یاسمین راشد، میاں محمود الرشید، ملک احمد خان بھچڑ، سینیٹر اعجاز چوہدری، بلال اعجاز، محمد احمد چٹھہ سمیت دیگر کارکنان کو دی گئی سزاؤں کی شدید مذمت کی۔
انہوں نے کہا کہ 26ویں آئینی ترمیم درحقیقت عدلیہ کی بچی کھچی خودمختاری کو بھی حکومتی دائرہ اختیار میں لانے کی کوشش ہے۔ ان کا کہنا تھا کہ وہ عمران خان کی سربراہی میں اس آئینی حملے کے خلاف اپنی جدوجہد جاری رکھیں گے تاکہ ملک میں آئین اور قانون کی اصل بالادستی بحال کی جا سکے۔
ادھر ذرائع کے مطابق راولپنڈی کی انسداد دہشتگردی عدالت نے 26 نومبر کو ہونے والے احتجاج سے متعلق تین مقدمات کی جلد سماعت کا فیصلہ کرتے ہوئے 25 جولائی کی تاریخ مقرر کر دی ہے۔ بدھ کے روز انسداد دہشتگردی عدالت کے جج امجد علی شاہ کے سامنے پراسیکیوشن نے باضابطہ درخواست جمع کرائی۔ پراسیکیوٹر سید ظہیر شاہ نے تھانہ صادق آباد کے مقدمہ نمبر 3393، واہ کینٹ کے 839 اور نصیر آباد کے مقدمہ نمبر 1862 کو فوری سماعت کے لیے پیش کرنے کی استدعا کی۔
عدالت نے استدعا منظور کرتے ہوئے تمام ملزمان اور وکلا کو نوٹس جاری کر دیے ہیں۔ ساتھ ہی عدالت نے مذکورہ تین مقدمات میں نامزد اور تاحال گرفتار نہ ہونے والے ملزمان کے خلاف وارنٹ گرفتاری بھی جاری کر دیے ہیں۔ پولیس نے اس فیصلے کے بعد خصوصی ٹیمیں تشکیل دے دی ہیں جو ملزمان کی گرفتاری کے لیے چھاپے مار رہی ہیں۔ ان افراد میں سابق صدر ڈاکٹر عارف علوی، وزیر اعلیٰ خیبرپختونخوا علی امین گنڈاپور، شاہد خٹک، خالد خورشید، عمر ایوب، شہریار ریاض، اسد قیصر، فیصل امین اور حماد اظہر سمیت کئی دیگر شخصیات شامل ہیں۔
