کراچی میمن گوٹھ میں تہرے قتل کیس میں اہم موڑ

کراچی کے علاقے میمن گوٹھ میں تین افراد کے قتل کیس کی تحقیقات میں نیا انکشاف سامنے آیا ہے۔ ابتدائی طور پر تینوں مقتولین کو خواجہ سرا قرار دیا گیا تھا، تاہم تحقیقات کے دوران پتا چلا ہے کہ ان میں سے ایک شادی شدہ مرد تھا۔

مقتولین کی تفصیل

🔹 جیئل اجن – خیرپور کے علاقے بوزدار وڈا کا رہائشی، ایم اے پاس، شادی شدہ اور 3 بچوں کا باپ۔
🔹 الیکس عرف عینی – خواجہ سرا، صفورہ کی رہائشی۔
🔹 اسماء – خواجہ سرا، بلاول گوٹھ کی رہائشی۔

پولیس کے مطابق تینوں کو بہت قریب سے گولیاں ماری گئیں، جائے وقوعہ سے نائن ایم ایم کے دو خول برآمد ہوئے ہیں۔

پولیس اور حکومتی اقدامات

ایس ایچ او میمن گوٹھ جاوید ابڑو کے مطابق واقعے کی تمام پہلوؤں سے تحقیقات کی جا رہی ہیں اور جائے وقوعہ سے مزید شواہد اکٹھے کیے جا رہے ہیں۔
پولیس کا کہنا ہے کہ امکان ہے کہ خواجہ سرا سڑک کنارے لفٹ کے لیے کھڑے تھے اور نامعلوم ملزمان نے قریب سے فائرنگ کر کے انہیں قتل کر دیا۔

وزیراعلیٰ سندھ نے واقعے کا فوری نوٹس لیتے ہوئے پولیس حکام کو قاتلوں کی جلد گرفتاری کی ہدایت کی ہے۔

پس منظر

یاد رہے کہ اس سے قبل جولائی میں پشاور کے علاقے تہکال میں بھی ایک خواجہ سرا کو نامعلوم افراد نے قتل کر دیا تھا، مقتول کی لاش ایک کمرے سے برآمد ہوئی تھی۔