کراچی: کراچی میٹروپولیٹن کارپوریشن (کے ایم سی) نے کمرشل اور انڈسٹریل صارفین پر میونسپل ٹیکس میں اضافہ کر دیا ہے۔
تفصیلات کے مطابق کمرشل اور صنعتی بجلی صارفین کے لیے میونسپل ٹیکس 400 روپے سے بڑھا کر 750 روپے کر دیا گیا ہے۔
کے ایم سی ٹیکس کی ریکارڈ وصولی
میئر کراچی مرتضیٰ وہاب کے مطابق جولائی میں کے الیکٹرک کے بلوں کے ذریعے کے ایم سی ٹیکس کی ریکارڈ وصولی ہوئی، جو کہ 33 کروڑ روپے سے زائد رہی۔
انہوں نے بتایا کہ ان ادائیگیوں کے بعد کے ایم سی کو 22 کروڑ روپے کی بچت حاصل ہوئی، جبکہ ٹیکس میں اضافے سے قبل یہ بچت محض 10 کروڑ روپے رہتی تھی۔
کے الیکٹرک کا کمیشن بڑھ گیا
کے ایم سی چارجز کی وصولی کے باعث کے الیکٹرک کی کمیشن آمدنی میں بھی اضافہ ہوا ہے۔
واضح رہے کہ کے ایم سی کچرا ٹیکس کی وصولی پر کے الیکٹرک 7.5 فیصد کمیشن لیتی ہے۔
تاجروں کا ردعمل
تاجر رہنما شرجیل گوپلانی نے اس اقدام پر شدید تنقید کرتے ہوئے کہا کہ کے ایم سی پہلے ہی تاجروں اور شہریوں سے کروڑوں روپے کچرا ٹیکس وصول کر چکی ہے۔
انہوں نے الزام لگایا کہ عوام اور تاجروں پر اربوں روپے کے ٹیکس اور اضافی بلوں کا بوجھ ڈال دیا گیا ہے، جس سے کاروباری برادری اور عام شہری دونوں مشکلات کا شکار ہیں۔
