اسلام آباد: نادرا (نیشنل ڈیٹا بیس اینڈ رجسٹریشن اتھارٹی) میں شہری اپنے شناختی کارڈ، ب فارم اور دیگر دستاویزات کے کوائف جمع کراتے ہیں، تاہم بعض اوقات نادرا زونل بورڈز کی جانب سے کوائف کی غلط توثیق یا غیرضروری تاخیر کی شکایات سامنے آتی ہیں۔
نادرا کے ڈپٹی ڈائریکٹر نعمان کیانی نے نادرا پوڈکاسٹ میں گفتگو کرتے ہوئے شہریوں کو ایسے معاملات میں شکایت درج کرانے کا مکمل طریقہ بتایا۔
ان کے مطابق اگر کسی شہری کو یہ محسوس ہو کہ اس کے فراہم کردہ کوائف یا شناختی دستاویزات پر لگائے گئے اعتراضات غیرمنصفانہ یا غلط ہیں، یا یہ سب زونل بورڈ کی کوتاہی کے باعث ہوا ہے، تو شہری کو نادرا میں شکایت درج کرانے کا مکمل حق حاصل ہے۔
نعمان کیانی نے وضاحت کی کہ شہری اپنی شکایت ریجنل ویری فکیشن بورڈ میں درج کرواسکتے ہیں، جو زونل بورڈ کے فیصلے کا ازسرِنو جائزہ لیتا ہے اور معاملہ دوبارہ ریویو کے لیے بھیج دیا جاتا ہے۔
اگر شکایت گزار اس فیصلے سے بھی مطمئن نہ ہو، تو اسے یہ حق حاصل ہے کہ وہ 30 روز کے اندر اپنی شکایت وفاقی حکومت کو بھیج سکتا ہے۔
نادرا کے مطابق، شکایت کے تمام مراحل شفاف اور منصفانہ طریقے سے نمٹائے جاتے ہیں تاکہ شہریوں کو ان کے حقوق کے حصول میں کسی قسم کی دشواری پیش نہ آئے۔
ماہرین کا کہنا ہے کہ شہری اگر نادرا کے کسی فیصلے کو غیرمنصفانہ سمجھتے ہیں تو وہ جلد از جلد مقررہ طریقہ کار کے مطابق شکایت درج کروائیں تاکہ ان کے کیس کا بروقت ازالہ ممکن ہوسکے۔
