کراچی میں ایک اور افسوسناک حادثے کے دوران واٹر ٹینکر نے موٹرسائیکل سوار میاں بیوی اور ان کے بچے کو ٹکر مار کر کچل دیا، جس کے نتیجے میں تینوں افراد شدید زخمی ہوگئے۔
اے آر وائی نیوز کے مطابق واقعہ کراچی کے علاقے میں پیش آیا، جہاں زخمیوں کو فوری طور پر جناح اسپتال منتقل کر دیا گیا، جہاں انہیں طبی امداد فراہم کی جا رہی ہے۔
پولیس حکام کے مطابق حادثے کے فوراً بعد مشتعل شہریوں نے واٹر ٹینکر کو آگ لگا دی۔ اطلاع ملنے پر پولیس اور فائر بریگیڈ کی ٹیمیں موقع پر پہنچ گئیں اور آگ پر قابو پالیا۔
ایس ایس پی ایسٹ نے بتایا کہ واقعے سے متعلق ضابطے کی کارروائی کی جا رہی ہے، جبکہ کالا پل کے قریب بھی پانی کے ٹینکر کی ٹکر سے ایک شخص زخمی ہوا ہے۔
یاد رہے کہ کراچی میں واٹر ٹینکرز کے باعث حادثات میں مسلسل اضافہ دیکھنے میں آ رہا ہے۔ گزشتہ ماہ ڈیفنس فیز ٹو میں تیز رفتار ٹینکر نے موٹرسائیکل سوار کو کچل کر ہلاک کردیا تھا۔
شہریوں نے متعلقہ حکام سے مطالبہ کیا ہے کہ شہر میں واٹر ٹینکرز کے لاپرواہ ڈرائیوروں کے خلاف سخت کارروائی کی جائے تاکہ مزید قیمتی جانوں کا ضیاع روکا جا سکے۔
