ملتان کے علاقے سیتل ماڑی پور والا میں ایک ہولناک واقعہ پیش آیا جہاں جائیداد کی لالچ اور خاندانی تنازع نے ایک معصوم بچی کی جان لے لی۔ پولیس کے مطابق آٹھ سالہ بچی کو اس کی اپنی دادی اور چچا نے بے دردی سے قتل کر ڈالا۔
تفصیلات کے مطابق عرفان سیال اپنی بیوی اور بیٹی کے ساتھ رہائش پذیر تھا، جبکہ اسی گھر میں اس کا چھوٹا بھائی فیصل سیال اور والدہ نسرین بھی رہتے تھے۔ ساس بہو کے درمیان جاری چپقلش اور جائیداد کے تنازع نے دونوں بھائیوں کو بھی ایک دوسرے کا مخالف بنا دیا۔ حالات اس نہج تک پہنچے کہ والدہ نسرین اور بیٹے فیصل نے مل کر بہو کو سبق سکھانے کی ٹھانی۔
منصوبے کے تحت دونوں نے رات کے وقت سوئی ہوئی بچی کو گلا گھونٹ کر قتل کیا اور لاش ایک ویران پلاٹ میں پھینک دی۔ اگلی صبح جب بچی گھر میں نہ ملی تو والد نے پولیس کو اطلاع دی۔ ابتدائی تحقیقات میں یہ بات سامنے آئی کہ بچی گھر سے باہر نہیں گئی تھی، جس پر شبہ گھر کے افراد پر گیا۔
پولیس نے شک کی بنیاد پر فیصل کو حراست میں لیا، جس نے دوران تفتیش جرم کا اعتراف کر لیا اور لاش کی نشاندہی بھی کر دی۔ بعدازاں پولیس نے فیصل اور اس کی والدہ نسرین کو گرفتار کر کے ان کے خلاف مقدمہ درج کر لیا۔
یہ دلخراش واقعہ خاندانی جھگڑوں اور جائیداد کی لالچ کے باعث ایک معصوم جان کی قربانی کی خوفناک مثال بن گیا، جس نے پورے علاقے کو لرزا کر رکھ دیا۔
