پشاور: داؤد زئی کے علاقے میں بچوں کی معمولی لڑائی نے بھیانک رخ اختیار کرلیا۔ بڑوں کے مداخلت کرنے پر جھگڑا شدت اختیار کر گیا جس کے دوران ملزمان نے اندھا دھند فائرنگ کردی۔ فائرنگ کے نتیجے میں دو خواتین سمیت تین افراد موقع پر جاں بحق ہوگئے جبکہ حملہ آور موقع سے فرار ہوگئے۔
پولیس کی کارروائی
اطلاع ملتے ہی پولیس اور امدادی ٹیمیں موقع پر پہنچ گئیں اور لاشوں کو اسپتال منتقل کردیا گیا۔ پولیس نے واقعے کا مقدمہ درج کرکے ملزمان کی گرفتاری کے لیے چھاپے مارنے شروع کردیے ہیں۔
پس منظر
یہ پہلا واقعہ نہیں، اس سے قبل بھی معمولی نوعیت کے جھگڑوں نے بڑے سانحات کو جنم دیا ہے۔ چند روز قبل اسلام آباد کے مضافاتی علاقے پیر سوہاوہ میں بچوں کی لڑائی پر مسلح تصادم ہوا تھا، جس میں ایک ہی خاندان کے تین افراد جاں بحق اور پانچ زخمی ہوگئے تھے۔ پولیس کے مطابق فریقین کے درمیان پرانی رنجش بھی موجود تھی۔
