کاراوی: سابق وفاقی وزیر ہمایوں اختر خان نے دریائے راوی میں آنے والے سیلاب سے متاثرہ علاقوں کا دورہ کیا اور متاثرہ خاندانوں سے ملاقات کر کے ان کے مسائل سنے۔
فلڈ ریلیف کیمپ اور بریفنگ
ہمایوں اختر خان نے چک نیکا وصلی، موضع شیرازہ اور چک نمبر 610 سمیت مختلف مقامات کا دورہ کیا۔ اس موقع پر انہوں نے بوائز ہائی اسکول گڑھ فتح شاہ میں قائم فلڈ ریلیف کیمپ کا بھی معائنہ کیا، جہاں انتظامیہ نے انہیں موجودہ صورتحال پر تفصیلی بریفنگ دی۔
متاثرین کی دلجوئی
سابق وفاقی وزیر نے سیلاب متاثرین سے ملاقات کی اور ان کا حوصلہ بڑھایا۔ انہوں نے کہا کہ:
"سیلاب سے بڑے پیمانے پر تباہی ہوئی ہے، مگر ہم متاثرہ خاندانوں کے ساتھ کھڑے ہیں۔ جب تک یہ لوگ اپنے گھروں میں دوبارہ آباد نہیں ہو جاتے، میں ان کی بحالی کے لیے آواز بلند کرتا رہوں گا۔”
کسانوں کے نقصان کا ازالہ ضروری
ہمایوں اختر خان نے زور دیا کہ حکومت سیلاب کا پانی اترنے کے بعد فوری اور شفاف سروے کرائے تاکہ متاثرہ کسانوں کے نقصانات کا درست اندازہ لگایا جا سکے۔ انہوں نے کہا کہ متاثرہ کسانوں کو نئی فصل کی کاشت کے لیے مالی معاونت دی جائے، کیونکہ معیشت کو سہارا دینے کے لیے کسانوں کے دکھوں کا مداوا ناگزیر ہے۔
ذاتی تعاون کا اعلان
انہوں نے یہ بھی کہا کہ وہ اور ان کے ساتھی ذاتی حیثیت میں بھی سیلاب متاثرین کی ہر ممکن مدد کریں گے تاکہ ان کے مسائل جلد حل ہو سکیں۔
–
