اسلام آباد: باخبر ذرائع نے وزیرِاعظم شہباز شریف کو تبدیل کرنے کے حوالے سے زیرِ گردش تمام قیاس آرائیوں کو بے بنیاد قرار دیتے ہوئے واضح کیا ہے کہ کسی بھی مبینہ ’’ونڈر بوائے‘‘ کی تلاش نہیں کی جا رہی۔
ذرائع کے مطابق وزیرِاعظم شہباز شریف اور فیلڈ مارشل کے درمیان تعلقات بدستور مضبوط، خوشگوار اور باہمی احترام پر مبنی ہیں۔ دونوں کے درمیان ورکنگ ریلیشن شپ، اعتماد اور ہم آہنگی میں کسی قسم کی کوئی کمی یا تبدیلی نہیں آئی۔
ایک سینئر سرکاری ذریعے نے اس حوالے سے پوچھے گئے براہِ راست سوال کے جواب میں کہا کہ ’’وزیرِاعظم اور فیلڈ مارشل کے تعلقات نہایت شاندار ہیں اور ان میں کسی بھی طرح کے اختلاف یا کشیدگی کی بات سراسر غلط ہے۔‘‘
ذرائع نے اس تاثر کو بھی مسترد کر دیا کہ کسی بڑے منصوبے کے تحت حکومت میں تبدیلی یا کسی غیر معمولی شخصیت کی ضرورت محسوس کی جا رہی ہے۔ ان کا کہنا تھا کہ ایسی تمام باتیں محض افواہوں پر مبنی ہیں اور ان کی کوئی حقیقت نہیں۔
یہ بحث اُس وقت شروع ہوئی جب سینئر صحافی اور کالم نگار سہیل وڑائچ کے ایک کالم میں ’’ونڈر بوائے‘‘ کی ضرورت کا ذکر کیا گیا۔ کالم میں کہا گیا تھا کہ موجودہ حالات میں ایک غیر معمولی صلاحیتوں کے حامل فرد کی ضرورت ہے جو برسوں کی کوتاہیوں کا ازالہ کر سکے۔
تاہم، باخبر حلقوں نے اس تشریح کو سختی سے رد کرتے ہوئے کہا ہے کہ نہ تو وزیرِاعظم کو تبدیل کرنے کا کوئی ارادہ ہے اور نہ ہی فوجی قیادت کے ساتھ ان کے تعلقات پر کوئی سوالیہ نشان موجود ہے۔ ذرائع کے مطابق وزیراعظم شہباز شریف اپنے عہدے پر مضبوطی سے موجود ہیں اور ریاستی اداروں کے درمیان مکمل ہم آہنگی پائی جاتی ہے۔
