کراچی (27 اگست 2025): کراچی کے علاقے اورنگی سے لاپتہ ہونے والا شہری وزیر داخلہ سندھ ضیا لنجار کے گھر کو آگ لگانے کے واقعے میں ملوث نکلا۔
سندھ ہائیکورٹ میں چار گمشدہ افراد کی بازیابی سے متعلق درخواستوں کی سماعت کے دوران پولیس نے بتایا کہ شہری عبداللطیف گمشدہ نہیں بلکہ مورو میں وزیر داخلہ کے گھر نذر آتش کرنے کے مقدمے میں گرفتار ہے۔ عدالت نے اس کی بازیابی کی درخواست نمٹا دی۔
دیگر گمشدہ شہریوں کا معاملہ
- پولیس نے مزید بتایا کہ محمد عرفان، جو ملیر کینٹ سے لاپتہ تھا، گھر واپس آگیا ہے۔
- وکیل درخواست گزار نے عدالت کو بتایا کہ نور محمد اور عبدالقدیر 2012 سے کراچی کے سٹی ایریا سے لاپتہ ہیں اور تاحال کوئی پیشرفت سامنے نہیں آئی۔
- عدالت نے دونوں گمشدہ افراد کے کیسز کو مسنگ پرسن کمیشن کے سپرد کر دیا۔
پس منظر
یاد رہے کہ مئی 2025 میں کینال منصوبے کے خلاف احتجاج کے دوران مورو میں مشتعل افراد نے وزیر داخلہ سندھ ضیا لنجار کے گھر کو آگ لگا دی تھی۔ اس موقع پر مظاہرین نے متعدد کنٹینرز کو بھی نذر آتش کیا اور قومی شاہراہ پر پولیس اہلکاروں پر تشدد کیا تھا۔
