ٹوبہ ٹیک سنگھ: کمالیہ کی تحصیل میں سیلابی صورتحال کے دوران ایک خاتون نے نہایت کٹھن حالات میں بچے کو جنم دیا، جس کے بعد ماں اور نومولود کو محفوظ مقام پر منتقل کردیا گیا۔
دریائے راوی اور ستلج میں سیلابی کیفیت
محکمہ فلڈ کنٹرول کے مطابق دریائے راوی میں انتہائی اونچے درجے کا سیلاب ہے، جبکہ بھارت کی جانب سے دریائے ستلج میں مزید پانی چھوڑنے سے خطرات میں اضافہ ہوگیا ہے۔ بھارتی ہائی کمیشن نے پاکستان کو اس پیش رفت سے آگاہ کردیا ہے۔
خان داچک میں معجزاتی پیدائش
خان داچک میں سیلابی پانی میں گھری ایک خاتون نے بچے کو جنم دیا۔ ریسکیو اہلکاروں نے کشتی کے ذریعے ماں اور نومولود کو بحفاظت نکالا اور ابتدائی طبی امداد فراہم کی۔
ریسکیو اہلکاروں کے مطابق ماں اور بچہ دونوں صحت مند ہیں۔ ایک اہلکار نے کہا:
"ننھے فرشتے کی جان بچا کر ہمیں بے پناہ خوشی ملی۔”
خیمہ بستی میں خوشی کی لہر
لاہور کے علاقے موہلنوال کے فلڈ ریلیف کیمپ میں بھی ایک خاتون یاسمین کے ہاں بیٹے کی پیدائش ہوئی۔ بچے کی آمد پر باپ، دادی اور دیگر رشتہ دار خوشی سے نہال ہوگئے۔ خیمہ بستی میں ننھے مہمان کی آمد سے ماحول خوشیوں سے بھر گیا۔
