پشاور ٹیکس آفس نے ضلع صوابی کے علاقے انبار میں بڑی کارروائی کرتے ہوئے لاکھوں کلو گرام غیر قانونی تمباکو برآمد کرلیا۔ ایف بی آر ذرائع کے مطابق کارروائی کے دوران ایک مکمل طور پر فعال جی ایل ٹی یونٹ پکڑا گیا جہاں سے بھاری مقدار میں تمباکو کا ذخیرہ قبضے میں لے لیا گیا۔
ذرائع کا کہنا ہے کہ برآمد ہونے والے تمباکو میں 5 لاکھ 14 ہزار 596 کلو ہینڈ اسٹیمڈ لیمینا، 35 ہزار 280 کلو تمباکو اسٹیم اور 74 ہزار 800 کلو گرین لیف شامل ہیں۔ حکام کے مطابق یہ تمباکو ایک نجی ٹوبیکو کمپنی کے نام پر موجود تھا جبکہ یونٹ کے مالک کی شناخت ربنواز کے نام سے ہوئی ہے۔
فیڈرل ایکسائز ایکٹ 2005 کی خلاف ورزی ثابت ہونے پر گودام اور تمام مشینری کو سیل کردیا گیا ہے۔ ابتدائی تحقیقات میں اربوں روپے کی ٹیکس چوری کا انکشاف ہوا ہے۔ حکام نے واضح کیا ہے کہ غیر قانونی تمباکو مینوفیکچرنگ اور ذخیرہ اندوزی کے خلاف کارروائیاں مزید تیز کی جائیں گی۔
حکام کے مطابق یہ کارروائی خصوصی عدالت سے حاصل کردہ سرچ وارنٹ کے تحت کی گئی، جبکہ کیس میں مزید قانونی کارروائی اور تفصیلی تحقیقات کا باقاعدہ آغاز کردیا گیا ہے۔
