لاہور (7 اکتوبر 2025) — لاہور کے علاقے ڈیفنس میں گزشتہ ہفتے نجی تعلیمی ادارے کے سربراہ میاں عادل رشید کے بیٹے احمد جاوید کے قتل کیس میں اہم پیشرفت سامنے آئی ہے۔ پولیس نے مرکزی ملزمان کی گرفتاری کے لیے خصوصی ٹیم تشکیل دے دی ہے۔
تفصیلات کے مطابق ڈی آئی جی انویسٹی گیشن ذیشان رضا کی سربراہی میں ایک اسپیشل انویسٹی گیشن ٹیم قائم کی گئی ہے، جو مرکزی ملزمان عبداللہ اور ابوبکر کی گرفتاری کے لیے مختلف مقامات پر چھاپے مار رہی ہے۔
تفتیشی ذرائع کے مطابق مقتول احمد جاوید کو ڈی ایچ اے فیز 9 میں پیر اور اتوار کی درمیانی شب قتل کیا گیا۔ پولیس کا کہنا ہے کہ واقعہ ایک پرائیویٹ پارٹی میں جھگڑے کے نتیجے میں پیش آیا۔
ذرائع نے انکشاف کیا ہے کہ موقع پر میاں اسد عرف مایا بھی موجود تھا، جسے پولیس نے حراست میں لے لیا ہے۔ بتایا گیا ہے کہ میاں اسد، معروف کاروباری شخصیت میاں وکی کا بھائی ہے۔
پولیس کے مطابق مقدمے میں نامزد ملزمان کے نام ایگزٹ کنٹرول لسٹ (PNIL) میں ڈال دیے گئے ہیں تاکہ وہ ملک سے فرار نہ ہو سکیں۔
ابتدائی تفتیش میں یہ بات سامنے آئی ہے کہ مقتول احمد جاوید کی ایک لڑکی کے ساتھ دوستی تھی جس پر ملزمان کو اعتراض تھا۔ واقعے کی رات دونوں فریقین کو ایک مشترکہ دوست نے صلح کے ارادے سے پارٹی میں مدعو کیا تھا، تاہم بات بگڑ گئی اور فائرنگ کے تبادلے میں احمد جاوید جاں بحق ہوگیا۔
پولیس ذرائع کا کہنا ہے کہ واقعے کی مزید تفتیش جاری ہے جبکہ پارٹی میں شریک دو لڑکیوں کو بھی حراست میں لے لیا گیا ہے تاکہ واقعے کے حقائق سامنے لائے جا سکیں۔
ذرائع کے مطابق پولیس کو امید ہے کہ آئندہ چند روز میں مرکزی ملزمان کی گرفتاری عمل میں آ جائے گی اور کیس کے تمام پہلوؤں کو جلد منظرِ عام پر لایا جائے گا۔
