ہمارا جلسہ پرامن ہوگا،یہ لانگ مارچ یا دھرنا نہیں ہے، انتظامیہ سے درخواست ہے کہ این اوسی کے بعداب جلسے میں رکاوٹ نہ ڈالی جائے، مرکزی رہنماء پی ٹی آئی بیرسٹر گوہر علی
اسلام آباد میں پی ٹی آئی کا بڑا دھماکہ: مہنگائی، عدلیہ کی آزادی، اور ‘امن’ کی دعوے داری!
اسلام آباد پاکستان تحریک انصاف کے مرکزی رہنما بیرسٹر گوہر علی نے کہا ہے کہ ہمارا جلسہ مہنگائی، لاقانونیت، اور عدلیہ کی آزادی کے لئے ہے۔ انہوں نے سنگجانی جلسہ گاہ کے باہر میڈیا سے گفتگو کرتے ہوئے کہا کہ کل اسلام آباد میں تاریخ کا سب سے بڑا جلسہ ہوگا اور انتظامیہ کا شکریہ ادا کیا کہ انہوں نے ہمیں این او سی دیا۔ ہمارا جلسہ پرامن ہے، یہ نہ تو لانگ مارچ ہے اور نہ دھرنا، بلکہ ہم آئین اور قانون کے تحت اپنے حق کا استعمال کر رہے ہیں۔ تمام اتحادی جماعتیں بھی ہمارے ساتھ ہوں گی۔
بیرسٹر گوہر نے بتایا کہ جلسے کی تیاریوں کی وجہ سے عمران خان سے ملاقات اڈیالہ جیل میں نہ ہو سکی، لیکن پیر کو ملاقات کا ارادہ ہے۔ انہوں نے انتظامیہ سے درخواست کی کہ چونکہ این او سی جاری ہو چکا ہے، لہذا کوئی رکاوٹ نہیں ہونی چاہیے۔ انہوں نے بتایا کہ پولیس نے ہمارے دو کارکنان کو پکڑ لیا ہے، اور ان سے کہا کہ یہ جلسہ پرامن ہے۔ جلسہ دو بجے شروع ہوگا اور ہماری کوشش ہوگی کہ وقت پر ختم ہو جائے، اگر ایک یا دو گھنٹے زیادہ ہو جائیں تو انتظامیہ کو تعاون کرنا چاہیے۔
بیرسٹر گوہر نے جنرل سیکرٹری عمر ایوب کے استعفے پر کہا کہ یہ پی ٹی آئی کا داخلی معاملہ ہے۔ مزید برآں، پی ٹی آئی کے مرکزی رہنما اور وزیراعلیٰ خیبرپختونخواہ علی امین گنڈا پور نے کہا کہ کل کے تاریخی جلسے میں ہم نے ثابت کرنا ہے کہ ہم حقیقی آزادی حاصل کریں گے، اور اپنی نسلوں کو ڈاکوؤں اور لٹیروں کے حوالے نہیں ہونے دیں گے۔ انہوں نے کہا کہ جو لوگ ان کو لاتے ہیں، انہیں بھی پیغام ہے کہ بس بہت ہوگیا، اور فرسودہ نظام سے آزادی حاصل کرنی ہے۔
