وزیر اعظم شہباز شریف نے پاور سیکٹر میں بنیادی اصلاحات کے لیے اور آئی پی پیز کے مسائل کو حل کرنے کے لیے ایک نئی ٹاسک فورس قائم کردی ہے۔ یہ ٹاسک فورس ایک ماہ میں اپنی سفارشات وزیراعظم کو پیش کرے گی۔ تفصیلات کے مطابق وفاقی وزیر توانائی اویس لغاری کو 8 رکنی ٹاسک فورس کا چیئرمین بنایا گیا ہے، جبکہ وزیراعظم کے معاون خصوصی محمد علی کو بھی اس کا کو چیئرمین مقرر کیا گیا ہے۔ لیفٹیننٹ جنرل محمد ظفر اقبال نیشنل کوآرڈینیٹر ہوں گے، اور گریڈ 21 کے افسر سید ذکریا علی شاہ بھی کمیٹی کا حصہ ہوں گے، ساتھ ہی نیپرا، سی پی پی اے، پی پی آئی بی اور ایس ای سی پی سے بھی ایک ایک ممبر اس فورس میں شامل کیا گیا ہے۔
اس ٹاسک فورس کو سرکاری یا نجی سیکٹر سے کسی بھی ماہر کی خدمات حاصل کرنے کا اختیار دیا گیا ہے، اور اس کے ٹی او آرز بھی جاری کر دیے گئے ہیں۔ یہ فورس کیپسٹی پیمنٹس کم کرنے اور بعض پاور پلانٹس بند کرنے کے لیے سفارشات تیار کرے گی، اور آئی پی پیز کی تخلیق اور پیداواری لاگت سے متعلق اقدامات کا بھی جائزہ لے گی۔
ٹی او آرز کے مطابق، ٹاسک فورس آئی پی پیز کے قیام میں غیر قانونی اقدامات، نقائص اور ریگولیٹری خامیوں کی نشاندہی کرے گی، اور پاور سیکٹر کے گردشی قرضے کے حل کے لیے اقدامات تجویز کرے گی۔ یہ فورس آئی پی پیز کے حکومت کے ساتھ معاہدوں کی شرائط کی پاسداری کا بھی جائزہ لے گی اور پاور سیکٹر کو مالی طور پر مستحکم بنانے کے لیے سفارشات فراہم کرے گی، ساتھ ہی انڈسٹریز اور خصوصی اقتصادی زونز میں بجلی کی کھپت بڑھانے سے متعلق تجاویز بھی تیار کی جائیں گی۔
