عمران خان، پاکستان تحریک انصاف کے چیئرمین، نے سپریم کورٹ کی حالیہ کارروائیوں پر شدید تنقید کی ہے اور کہا ہے کہ موجودہ صورتحال سب کے سامنے ہے اور جو کچھ ہو رہا ہے، وہ دراصل "گینگ آف تھری” کو توسیع دینے کی کوشش ہے۔ عمران خان نے راولپنڈی کی اڈیالہ جیل میں 190 ملین پاؤنڈز ریفرنس کی سماعت کے دوران صحافیوں سے غیر رسمی گفتگو کرتے ہوئے ان خیالات کا اظہار کیا۔
عمران خان نے مزید کہا کہ ملک کی معیشت اور عدلیہ کو نقصان پہنچایا جا رہا ہے، اور انہوں نے الزام لگایا کہ موجودہ حکومت عدلیہ کو اپنے مفادات کے لیے تباہ کرنے کے درپے ہے۔ ان کا کہنا تھا کہ حکومت کو اپنے حمایت یافتہ ججز چاہیے تاکہ الیکشن میں دھاندلی کے الزامات کو دبایا جا سکے۔ انہوں نے چیف جسٹس قاضی فائز عیسیٰ پر تنقید کرتے ہوئے کہا کہ وہ الیکشن فراڈ کی حمایت کر رہے ہیں اور ججز کو دھمکیاں دی جا رہی ہیں۔
عمران خان نے اسلام آباد ہائیکورٹ کے ججز کی آواز نہ سننے پر بھی چیف جسٹس کو تنقید کا نشانہ بنایا اور کہا کہ سپریم کورٹ کا نظام خطرے میں ہے۔ انہوں نے دعویٰ کیا کہ چیف الیکشن کمشنر آرٹیکل 6 کے تحت کاروائی سے بچنے کے لیے دھاندلی کو چھپا رہے ہیں۔ عمران خان نے اگلے چیف جسٹس کی تقرری کی اہمیت پر زور دیا اور جسٹس منصور علی شاہ کی حمایت کا اعلان کیا۔
