لاہور: پاکستان کرکٹ بورڈ (پی سی بی) نے کپتانوں کی تبدیلی سے متعلق خبروں کی تردید کرتے ہوئے کہا ہے کہ اس حوالے سے کوئی فیصلہ نہیں ہوا۔ پی سی بی کے مطابق محمد رضوان کی جگہ آغا سلمان کو اور شان مسعود کی جگہ سعود شکیل کو کپتان بنانے کی اطلاعات درست نہیں ہیں۔ بورڈ نے واضح کیا کہ سلیکشن کمیٹی کے ایجنڈے میں ایسا کوئی معاملہ زیر غور ہی نہیں آیا اور تمام خبریں محض افواہیں ہیں۔
محسن نقوی کا بھارت پر سخت مؤقف
چیئرمین پی سی بی محسن نقوی نے میڈیا سے گفتگو کرتے ہوئے کہا کہ بھارت کے ساتھ بات چیت کے لیے بھیک مانگنے کا وقت گزر گیا ہے۔ ان کے بقول، اب اگر بات ہوگی تو برابری کی سطح پر ہوگی۔ انہوں نے امید ظاہر کی کہ بھارتی ٹیم سیاست سے الگ ہوکر کھیل پر توجہ دے گی تو حالات بہتر ہوں گے۔
محسن نقوی نے مزید کہا کہ ٹیم میں شامل کیے جانے یا نکالے جانے کا فیصلہ سلیکشن کمیٹی کا کام ہے، اور اس وقت سب کو ٹیم کی حوصلہ افزائی کرنی چاہیے۔ ان کا کہنا تھا کہ "ایک میچ کے بعد ہی ٹیم پر کڑی تنقید شروع ہوجاتی ہے، کھلاڑیوں کو محنت کرنا ہے اور ہمیں ان کے پیچھے کھڑا ہونا ہے۔”
بورڈ آف گورنرز اجلاس
چیئرمین کی زیر صدارت پی سی بی بورڈ آف گورنرز کا اجلاس بھی ہوا، جس میں کرکٹ کے معیار کو بہتر بنانے کے اقدامات پر غور کیا گیا۔ اجلاس میں خواتین کرکٹ کے فروغ کے لیے گراس روٹ لیول اقدامات، ڈومیسٹک کرکٹ کی مضبوطی اور نیا ٹیلنٹ سامنے لانے کے حوالے سے بریفنگ دی گئی۔
اس کے علاوہ اجلاس میں پی سی بی کے اپ ڈیٹڈ فنانشل رولز کی منظوری اور موجودہ مالی سال کے آڈیٹرز کے تقرر کی بھی منظوری دی گئی۔
خواتین ورلڈ کپ اسکواڈ کا اعلان
دریں اثنا آئی سی سی ویمنز کرکٹ ورلڈ کپ کے لیے 15 رکنی پاکستانی اسکواڈ کا اعلان بھی کردیا گیا ہے، جسے خواتین کرکٹ کے فروغ کی سمت ایک اہم قدم قرار دیا جارہا ہے۔
