کمچاتکا جزیرہ نما میں 7.0 شدت کے زلزلے کے ساتھ آتش فشاں پھٹ پڑا، سونامی وارننگ جاری
بحرالکاہل میں 8.8 شدت کے زلزلے کے باعث جاری سونامی انتباہ کے چند دن بعد ہی، روس کے انتہائی مشرقی علاقے میں واقع ایک آتش فشاں نے اتوار کے روز گرم راکھ کو آسمان کی بلندیوں تک اچھال دیا، جو اس آتش فشانی سلسلے کی کئی صدیوں بعد پہلی بڑی سرگرمی ہے۔
"کرشینینیکوف” نامی آتش فشاں، جو روس کے مشرقی کمچاتکا جزیرہ نما پر واقع ہے، نے تقریباً 6 کلومیٹر (یا 3.7 میل) بلند راکھ کا بادل فضا میں بھیجا، جیسا کہ "کرونوتسکی ریزرو” کے عملے نے بتایا۔
روسی سرکاری میڈیا نے آتش فشاں کے پھٹنے کی تصاویر جاری کیں، جو کرونوتسکی ریزرو میں واقع ہے۔ تصاویر میں دیکھا جا سکتا ہے کہ راکھ کے گھنے بادل آتش فشاں کے دہانے سے بلند ہو رہے ہیں۔
کمچاتکا کی ایمرجنسی وزارت نے ٹیلیگرام پر لکھا:
"راکھ کا بادل آتش فشاں سے مشرق کی طرف، بحرالکاہل کی سمت بڑھ رہا ہے۔ اس کے راستے میں کوئی آبادی نہیں، اور کسی آباد علاقے میں راکھ گرنے کی اطلاع نہیں ملی ہے۔”
اس آتش فشانی سرگرمی کے ساتھ 7.0 شدت کا زلزلہ بھی آیا، جس کے باعث کمچاتکا کے تین علاقوں کے لیے سونامی کی وارننگ جاری کی گئی۔
تاہم بعد میں روس کی وزارتِ ہنگامی خدمات نے سونامی کی وارننگ واپس لے لی۔
"یہ کرشینینیکوف آتش فشاں کا 600 سال میں پہلا تاریخی طور پر تصدیق شدہ پھٹنا ہے،” کمچاتکا وولکینک ایروپشن ریسپانس ٹیم کی سربراہ اولگا گیرینا نے روسی خبر رساں ایجنسی "ریا نووستی” کو بتایا۔
لیکن امریکی ادارے "سمتھ سونین انسٹیٹیوشن” کے گلوبل وولکینزم پروگرام کے مطابق کرشینینیکوف آخری بار 1550ء میں پھٹا تھا، یعنی تقریباً 475 سال قبل۔
اس تضاد کی فوری طور پر کوئی واضح وجہ سامنے نہیں آ سکی۔
