پیرس اولمپکس کی 118 سالہ تاریخ کو بدلنے والے اور پاکستان کے لیے گولڈ میڈل جیتنے والے ارشد ندیم نے حیرت انگیز طور پر کہا کہ ’آج میرا دن تھا، میں اس سے بھی زیادہ دور پھینک سکتا تھا‘۔ ارشد ندیم نے اولمپک تاریخ کی سب سے بڑی 92.97 میٹر کی تھرو پھینکی اور بھارتی جیولن تھرور نیرج چوپڑا کو شکست دے کر سونے کا تمغہ جیتا۔
پاکستان کو اولمپک گیمز میں پہلا انفرادی گولڈ میڈل دلوانے والے ارشد ندیم نے مقابلے کے بعد میڈیا سے گفتگو کرتے ہوئے کہا کہ وہ اپنی ٹریننگ اور محنت پر پوری طرح یقین رکھتے تھے کہ وہ گولڈ میڈل جیتیں گے۔ ارشد ندیم نے 40 سال بعد ملک کے لیے گولڈ میڈل حاصل کرنے پر خوشی کا اظہار کرتے ہوئے کہا کہ ہم اس گولڈ میڈل کے ساتھ 14 اگست کو جشن منائیں گے۔ پاکستان اولمپک ایسوسی ایشن اور اپنے کوچ کا شکریہ ادا کرتے ہوئے ارشد ندیم نے کہا کہ ان کی سپورٹ کے بغیر یہ کامیابی ممکن نہ ہوتی۔
