پاکستان تحریک انصاف کے چیئرمین عمران خان نے اپنی پارٹی کو ہدایت دی ہے کہ اگلا جلسہ میانوالی کے بجائے آئندہ ہفتے راولپنڈی میں منعقد کیا جائے۔ راولپنڈی کی اڈیالہ جیل میں صحافیوں سے غیر رسمی گفتگو کرتے ہوئے عمران خان نے کہا کہ جلسے کی اجازت کے لیے ہائی کورٹ سے رجوع کیا جائے اور مزید کہا کہ حکومت عدلیہ کو ختم کرکے غیر اعلانیہ مارشل لاء نافذ کرنے کی کوشش کر رہی ہے۔ انہوں نے خبردار کیا کہ اگر جلسے کی اجازت نہ ملی تو PTI احتجاج کرے گی اور آئینی ترامیم کے خلاف سٹریٹ موومنٹ کا آغاز کیا جائے گا۔
عمران خان نے لاہور جلسے کا حوالہ دیتے ہوئے کہا کہ جلسے سے ایک دن قبل اجازت دی گئی اور پھر رکاوٹیں کھڑی کی گئیں، تاہم ان کی پارٹی نے تمام رکاوٹوں کے باوجود کامیاب جلسہ کیا۔ انہوں نے کہا کہ PTI کے جلسے میں لوگ پیدل آتے ہیں، اور کسی طرح کی لالچ یا سہولتیں فراہم نہیں کی جاتیں، جیسے کہ بعض دوسری جماعتیں کرتی ہیں۔
اس کے علاوہ، عمران خان نے اسرائیلی اخبار میں اپنے بارے میں چھپنے والے آرٹیکل پر ردعمل دیتے ہوئے کہا کہ یہ پراپیگنڈا کیا جا رہا ہے کہ وہ اسرائیل کے حامی ہیں۔ انہوں نے کہا کہ ان کا مؤقف اسرائیل کے حوالے سے ہمیشہ وہی رہا ہے، کہ جب تک اسرائیل فلسطینیوں کی نسل کشی بند نہیں کرتا اور دو ریاستی حل کی جانب پیش رفت نہیں ہوتی، کوئی بات چیت ممکن نہیں۔
