شاہد خاقان عباسی نے موجودہ حکومت پر تنقید کرتے ہوئے کہا ہے کہ اس کے پاس نہ تو عوامی مینڈیٹ ہے اور نہ ہی کارکردگی، اور نئے قوانین بنا کر حکومت کرنے کا عمل اس کی ناکامی کا اعتراف ہے۔ ان کے مطابق حکومت کو پی ٹی آئی کی ناقص کارکردگی کی وجہ سے استحکام ملا ہے، لیکن حکومت کی اصل طاقت اس کے مینڈیٹ اور بہتر طرزِ حکمرانی میں ہوتی ہے، جو اس حکومت کے پاس نہیں ہے۔
انہوں نے قومی ایئرلائن (پی آئی اے) کی نجکاری پر بھی اپنی رائے دی اور کہا کہ حکومت کی جانب سے پی آئی اے کی 85 ارب روپے کی قیمت غیر حقیقی ہے اور مارکیٹ اس بولی کو قبول نہیں کر رہی۔ ان کا کہنا تھا کہ اگر حکومت 10 ارب روپے کی بولی کو قبول کرے تو زیادہ بہتر ہوگا۔
عباسی نے اپوزیشن کے کردار پر بات کرتے ہوئے کہا کہ پی ٹی آئی کی سیاست کا مرکزی مقصد صرف عمران خان کی رہائی ہے، جبکہ ان کے مطابق اپوزیشن کا کردار ملک کے مسائل پر بات کرنا اور ٹھوس مؤقف اپنانا ہونا چاہیے۔ انہوں نے پی ٹی آئی کی جانب سے امیدیں وابستہ کرنے پر بھی تنقید کی کہ ٹرمپ کی مداخلت سے عمران خان کو جیل سے رہا کروایا جا سکتا ہے اور اسے خام خیالی قرار دیا۔
