مقدمات میں سزاؤں کا مقصد سمجھ آرہا ہے کہ جیلوں میں ڈالنا ہے، پی ٹی آئی رہنماؤں کو جیلوں میں ڈالنے کیلئے ایک ڈیڈلائن رکھی گئی ہے، مقدمات میں سزائیں دے کر فیئرٹرائل کو پامال کیا جارہا ہے۔، سیکرٹری جنرل پی ٹی آئی سلمان اکرم راجا
اسلام آباد – پاکستان تحریک انصاف کے سیکرٹری جنرل سلمان اکرم راجا نے انکشاف کیا ہے کہ 9 مئی کے مقدمات میں دی گئی سزاؤں کے خلاف چیف جسٹس آف پاکستان سے رجوع کریں گے اور باقاعدہ ایک خط بھی ارسال کیا جائے گا۔ ان کا کہنا تھا کہ یہ صاف نظر آ رہا ہے کہ سزاؤں کا مقصد صرف یہ ہے کہ پی ٹی آئی کے رہنماؤں کو ہر حال میں جیلوں میں بند کیا جائے، اور اس سب کے پیچھے ایک مقررہ ڈیڈلائن کام کر رہی ہے۔ سلمان اکرم نے زور دے کر کہا کہ ان فیصلوں سے منصفانہ ٹرائل کے بنیادی اصولوں کو پامال کیا جا رہا ہے۔
انہوں نے ایک معروف ٹی وی پروگرام میں گفتگو کرتے ہوئے کہا کہ عمران خان کو پہلے ہی مختلف مقدمات میں سزائیں دی جا چکی ہیں، اور اب سازشی عناصر کی یہ کوشش ہے کہ مزید سزائیں بھی دی جائیں۔ ان کا کہنا تھا کہ ہزاروں کارکنان اور ووٹرز کے خلاف جھوٹے مقدمات درج کیے گئے ہیں۔ سزاؤں کا یہ سلسلہ صرف اور صرف سیاسی انتقام پر مبنی ہے، جو عدالتی نظام کے چہرے پر سیاہ دھبہ ہے۔
سلمان اکرم راجا نے مزید کہا کہ چیف جسٹس کو ایک تفصیلی خط لکھا جا رہا ہے، ساتھ ہی ایک آئینی درخواست بھی دائر کی جائے گی تاکہ یہ واضح کیا جا سکے کہ ان ہی کے فیصلوں کی آڑ میں پی ٹی آئی کے خلاف اقدامات اٹھائے جا رہے ہیں۔
انہوں نے اس بات پر حیرت کا اظہار کیا کہ جن افراد نے پارٹی چھوڑ کر پریس کانفرنس کی، وہ تمام مقدمات سے بچ نکلے، جبکہ جو وفادار رہے، وہ آج عدالتوں میں گھسیٹے جا رہے ہیں۔ انہوں نے کہا کہ اگر 9 مئی کے مقدمات میں 30 افراد کے خلاف چالان پیش کیا گیا تھا، تو ان میں سے 10 افراد نے پریس کانفرنس کر کے نجات حاصل کر لی، جبکہ باقی 20 اب بھی عدالتی کارروائی بھگت رہے ہیں۔
ان کا کہنا تھا کہ پی ٹی آئی کے خلاف یہ سارا منصوبہ ایک سیاسی سازش ہے، جس کا مقصد پارٹی کے اندر انتشار پیدا کرنا ہے۔ تاہم انہوں نے اعلان کیا کہ ان فیصلوں کے خلاف صرف قانونی چارہ جوئی ہی نہیں بلکہ ایک بھرپور عوامی تحریک بھی چلائی جائے گی۔
سلمان اکرم راجا کا کہنا تھا کہ تاریخ نے کبھی بھی کسی ایک سیاسی ورکر کے نکلنے سے خود کو نہیں بدلا، بلکہ تب ہی تبدیلی آتی ہے جب پوری قوم یکجا ہو کر باہر نکلتی ہے۔ انہوں نے واضح کیا کہ پرامن احتجاج ہر شہری کا آئینی اور قانونی حق ہے، اور پی ٹی آئی اس حق کو استعمال کرنے سے پیچھے نہیں ہٹے گی۔
