امریکی تاریخ میں بے شمار خطرناک قاتلوں نے خوف کی فضا قائم کی، لیکن "جان وین گیسی” وہ نام ہے جو آج بھی خوف، نفرت، اور دہشت کی علامت سمجھا جاتا ہے۔
یہ وہ شخص تھا جو دن کے وقت “پوگو دی کلاون” کے نام سے بچوں کی سالگرہ کی تقریبات میں مسکراتا ہوا نظر آتا، مگر رات کے اندھیروں میں موت اور بربریت کا کھیل کھیلتا تھا۔
جان وین گیسی کو امریکی تاریخ کے سب سے بدنام اور خوفناک سیریل کلرز میں شمار کیا جاتا ہے۔ وہ دراصل ایک جنسی مجرم اور قاتل تھا جس نے 1972 سے 1978 کے دوران شکاگو (الینوائے) کے مضافاتی علاقے نوروڈ پارک ٹاؤن شپ میں کم از کم 33 نوجوانوں کو جنسی زیادتی، تشدد، اور قتل کا نشانہ بنایا۔
اس کی کہانی ایک ایسے مسکراتے قاتل کی ہے جو عام شہری کے روپ میں شیطان کی شکل اختیار کر چکا تھا — وہی “Devil in Disguise” جسے دنیا آج تک بھلا نہیں سکی اور شاید کبھی بھلا بھی نہ پائے۔
1942 میں شکاگو میں پیدا ہونے والا جان وین گیسی بظاہر ایک مثالی شہری دکھائی دیتا تھا۔ وہ دن میں کنسٹرکشن بزنس چلاتا، سیاست میں حصہ لیتا، اور شام کو ہسپتالوں میں جا کر بیمار بچوں کو کلاون میک اپ میں خوش کرتا۔
لیکن اس کے اندر چھپا ہوا ذہنی عفریت اندھیرے، خوف، اور وحشت کا طوفان تھا، جو آخرکار بے نقاب ہوا اور اسے امریکہ کے سب سے خوفناک قاتلوں میں سے ایک بنا دیا۔
