بانی پی ٹی آئی عمران خان نے ایک بار پھر واضح پیغام دیا ہے کہ اگر لاہور میں جلسے کی اجازت نہ دی گئی تو وہ جلسے کو احتجاج میں تبدیل کر دیں گے۔ ان کا کہنا ہے کہ مینار پاکستان پر سپریم کورٹ اور جمہوریت کو بچانے کے لیے جلسہ کیا جائے گا، کیونکہ جلسہ کرنا ہمارا آئینی حق ہے۔ انہوں نے یہ بھی کہا کہ اگر لاہور کے ڈپٹی کمشنر نے اجازت نہیں دی تو پھر وہ مینار پاکستان پر بھرپور احتجاج کریں گے۔
اڈیالہ جیل میں صحافیوں سے گفتگو کرتے ہوئے عمران خان نے کہا کہ آج ملک میں دو واضح لائنیں کھینچ دی گئی ہیں۔ ایک طرف جمہوریت پسند اور دوسری طرف بوٹ کو عزت دینے والے موجود ہیں۔ 8 فروری کے الیکشن نے یہ ثابت کر دیا کہ قوم کہاں کھڑی ہے، جبکہ ایک چھوٹا طبقہ جمہوریت اور سپریم کورٹ کو اپنے اقتدار کے لیے تباہ کر رہا ہے۔
انہوں نے افسوس کا اظہار کیا کہ لاہور میں پچھلے ڈیڑھ سال سے انہیں جلسہ کرنے نہیں دیا جا رہا، جبکہ الیکشن سے پہلے بھی ان کے جلسوں پر پابندیاں لگائی گئیں اور اب بھی روکا جا رہا ہے۔ عمران خان نے انکشاف کیا کہ سٹیبلشمنٹ نے اسلام آباد جلسے کی گارنٹی دی تھی، لیکن پھر بھی وہاں کنٹینرز لگا کر رکاوٹیں کھڑی کی گئیں۔
عمران خان نے مزید کہا کہ پرویز مشرف کا دور، ان کے مقابلے میں، فری اینڈ فیئر الیکشنز کا دور تھا، کیونکہ مشرف نے میڈیا یا جلسوں پر پابندی نہیں لگائی تھی۔ ان کا یہ بھی کہنا تھا کہ قاضی فائز عیسیٰ اور چیف الیکشن کمشنر ن لیگ کی ٹیم کا حصہ ہیں اور ان کی درخواستیں منظور ہو رہی ہیں، جبکہ پی ٹی آئی کی درخواستیں مسترد کی جا رہی ہیں۔
سابق وزیراعظم نے کہا کہ قاضی فائز عیسیٰ کو پی ٹی آئی کے مقدمات سے خود کو الگ کر لینا چاہیے، کیونکہ ان کی بیوی نے عمران خان کے خلاف باتیں کیں۔ انہوں نے مزید کہا کہ آج ملک کے حالات مشرف اور ضیاء الحق کے دور سے بھی بدتر ہیں، اور یہ صورتحال جمہوریت کی تباہی کی عکاسی کرتی ہے۔
عمران خان نے حمود الرحمان کمیشن رپورٹ کا حوالہ دیتے ہوئے کہا کہ آج ملک میں وہی حالات ہیں جیسے ماضی میں تھے۔ ان کا کہنا تھا کہ ملک میں جو کچھ ہو رہا ہے، وہ انتخابات کو ایڈمنسٹریٹیو طریقے سے متاثر کرنے کی کوشش ہے، اور جو اقدامات کیے جا رہے ہیں، وہ جمہوریت کے لیے نقصان دہ ہیں۔
ملک کی پہلی حکومت کو شدید تنقید کا نشانہ بناتے ہوئے عمران خان نے کہا کہ یہ حکومت بری طرح بے نقاب ہو چکی ہے اور جو یہ کر رہی ہے، وہ جمہوریت کی تباہی کے سوا کچھ نہیں۔
