چیف جسٹس آف پاکستان قاضی فائز عیسیٰ نے اپنی ریٹائرمنٹ سے قبل چیمبر ورک شروع کر دیا ہے، جس کے دوران وہ زیر التوا فیصلے تحریر کریں گے۔ چیف جسٹس قاضی فائز عیسیٰ 25 اکتوبر 2024 کو ریٹائر ہو رہے ہیں، اور اب وہ عدالت میں بینچ کی سربراہی کے بجائے چیمبر میں رہ کر اہم فیصلوں کو مکمل کریں گے۔ اس دوران، سپریم کورٹ کا کورٹ روم نمبر ایک جسٹس منصور علی شاہ کی سربراہی میں کام کرے گا، جہاں جسٹس عائشہ ملک اور جسٹس عقیل بلال عباسی بھی شامل ہیں۔
چیف جسٹس قاضی فائز عیسیٰ کو مختلف کیسز کے فیصلے تحریر کرنے ہیں، جن میں پی ٹی آئی انٹرا پارٹی الیکشن کیس اور مخصوص نشستوں کے فیصلے شامل ہیں۔ اس دوران، نئے چیف جسٹس کی تقرری کے لیے ایک خصوصی پارلیمانی کمیٹی اجلاس منعقد کرے گی، جس میں تین سینئر ججز کے ناموں پر غور کیا جائے گا۔
چیف جسٹس نے اپنی ریٹائرمنٹ کے موقع پر فل کورٹ ریفرنس میں شرکت کا فیصلہ کیا ہے، جو 25 اکتوبر کو سپریم کورٹ میں منعقد ہوگا، تاہم انہوں نے سرکاری خرچ پر الوداعی ڈنر لینے سے معذرت کر لی ہے۔ انہوں نے یہ موقف اپنایا کہ الوداعی ڈنر پر 20 لاکھ سے زائد خرچ آتا ہے، اس لیے وہ اس میں شرکت نہیں کریں گے، لیکن سپریم کورٹ بار کی جانب سے دیے گئے عشائیہ میں شرکت کی دعوت قبول کر لی ہے۔
