کراچی: سرجانی پولیس نے خفیہ اطلاع پر کارروائی کرتے ہوئے کار لفٹنگ کی متعدد وارداتوں میں ملوث ایک مطلوب ملزم کو گرفتار کرلیا۔
پولیس کے مطابق گرفتار ملزم محمد علی کے قبضے سے سرکاری کار سمیت 5 چوری شدہ گاڑیاں برآمد ہوئیں۔ اس کے علاوہ ملزم سے 9 ایم ایم پستول، گاڑیوں کے ٹیپ اور ٹائر بھی ضبط کیے گئے۔
گاڑیاں کہاں کہاں سے چرائی گئیں؟
ایس ایس پی ویسٹ طارق الٰہی مستوئی نے بتایا کہ ملزم نے کراچی کے مختلف علاقوں سے گاڑیاں چرائیں:
- ایک سرکاری گاڑی عزیز بھٹی تھانے کی حدود سے، جو سندھ ٹیکنیکل ایجوکیشن اینڈ ووکیشنل ٹریننگ اتھارٹی کو الاٹ تھی۔
- دوسری گاڑی عزیز آباد سے۔
- تیسری گلبرگ سے۔
- چوتھی بلال کالونی سے۔
- پانچویں جوہر آباد سے۔
کار لفٹنگ کا طریقہ واردات
حکام کے مطابق ملزم ماسٹر چابی کے ذریعے گاڑیاں چرا کر بعض اوقات ان کا سامان فروخت کرتا جبکہ کہیں پوری گاڑی بیچ دیتا تھا۔
ایس ایس پی طارق مستوئی کا کہنا ہے کہ ملزم سے مزید تفتیش جاری ہے تاکہ اس کے نیٹ ورک اور دیگر جرائم کا پتہ لگایا جا سکے۔
