پاکستان تحریک انصاف کے رہنما شوکت یوسفزئی نے کہا ہے کہ سابق امریکی صدر ٹرمپ کی پالیسیاں غیر مستقل ہیں اور وہ اکثر غیر متوقع فیصلے کرتے ہیں۔ انہوں نے کہا کہ پاکستان میں بجلی مہنگی ہے جس کی وجہ سے برآمدات میں اضافہ مشکل ہو گیا ہے۔ ان کا کہنا تھا کہ اگر بجلی سستی کی جائے اور گیس کی لوڈشیڈنگ ختم کی جائے تو ملکی ایکسپورٹ میں نمایاں بہتری آ سکتی ہے۔
جیو نیوز کے ایک پروگرام میں گفتگو کرتے ہوئے شوکت یوسفزئی نے کہا کہ اگر 1972 سے اب تک کی صورتحال دیکھی جائے تو 10 سال ضیاء الحق کا مارشل لاء اور 10 سال پرویز مشرف کی حکومت نکال دیں تو باقی 53 سال نواز شریف اور آصف زرداری کی حکومتوں نے گزارے ہیں۔ انہوں نے مزید کہا کہ شہباز شریف کہتے ہیں کہ معیشت بہتر ہو گئی ہے، لیکن انہوں نے 35 ہزار ارب روپے کا قرضہ لیا، تو پھر معیشت کس طرح بہتر ہو سکتی ہے؟
انہوں نے دہری شہریت کے معاملے پر بھی حکومت کو تنقید کا نشانہ بناتے ہوئے کہا کہ حکومت کو کھل کر مسائل پر بات کرنی چاہیے اور دہری شہریت رکھنے والوں کے خلاف اقدامات اٹھانے چاہئیں۔ انہوں نے دہری شہریت کو ممکنہ خطرہ قرار دیا۔
اسی پروگرام میں سینیٹر افنان اللہ نے گفتگو کرتے ہوئے کہا کہ امریکی منڈی بہت بڑی ہے اور ہمیں 19 فیصد ٹیرف کے فائدے سے بھرپور استفادہ کرنا چاہیے۔ ان کا کہنا تھا کہ بجلی کی قیمتوں میں کمی کر کے ایکسپورٹ میں اضافہ ممکن ہے۔ انہوں نے واضح کیا کہ سیاستدانوں اور وزیروں کو دہری شہریت نہیں رکھنی چاہیے، حالانکہ فیڈرل سیکریٹریز کو اس کی اجازت ہے۔
افنان اللہ نے کہا کہ وہ سمجھتے ہیں کہ بیوروکریسی میں دہری شہریت نہیں ہونی چاہیے کیونکہ یہ دوہری وفاداری کا مسئلہ پیدا کر سکتی ہے۔ انہوں نے سابق انڈس واٹر کمشنر جماعت علی شاہ کی مثال دیتے ہوئے کہا کہ وہ دہری شہریت رکھتے تھے اور جو کچھ انہوں نے کیا، وہ سب کے سامنے ہے۔
