متحدہ عرب امارات نے اپنے لیبر قانون میں بڑی تبدیلی کرتے ہوئے وزٹ ویزہ رکھنے والوں کے لیے ملازمت کے مواقع فراہم کرنے پر بھاری جرمانے عائد کرنے کا اعلان کیا ہے۔ خلیج ٹائمز کے مطابق، یہ نئی ترمیم آجروں کو پابند کرے گی کہ وہ وزٹ ویزہ رکھنے والوں کو ملازمت فراہم نہ کریں، بصورت دیگر انہیں ایک لاکھ سے دس لاکھ درہم تک جرمانہ کیا جائے گا۔ ان خلاف ورزیوں میں بغیر اجازت نامے کے کارکنوں کو ملازمت دینا، انہیں یو اے ای لانا یا انہیں مناسب ملازمت فراہم نہ کرنا شامل ہے۔
متحدہ عرب امارات کی حکومت نے واضح طور پر کہا ہے کہ وزٹ یا ٹورسٹ ویزے پر کام کرنا غیر قانونی ہے۔ اگر کسی غیر ملکی کو یو اے ای میں ملازمت کی پیشکش کی جاتی ہے، تو وہ صرف وزارت برائے انسانی وسائل اور امارات (MOHRE) کی جانب سے جاری کردہ آفر لیٹر کے بعد ہی کام کر سکتے ہیں۔
ای سی ایچ ڈیجیٹل کے ڈائریکٹر، علی سعید الکعبی، نے اس حوالے سے کہا کہ "پہلے بغیر ورک پرمٹ کے کام کرنے والوں پر جرمانے 50 ہزار درہم سے 2 لاکھ درہم تک تھے، لیکن اب یہ رینج بڑھا کر 1 لاکھ سے 10 لاکھ درہم کر دی گئی ہے، جو حکومت کی جانب سے کارکنوں کے حقوق کے تحفظ کی سنجیدگی کو ظاہر کرتی ہے۔ یہ ترامیم روزگار کے قانونی طریقوں کو یقینی بنائیں گی، کیوں کہ کچھ آجر وزٹ ویزا رکھنے والوں کو ان کے سیاحتی اجازت ناموں کی میعاد ختم ہونے کے بعد رہائش اور ورک پرمٹ دینے کا وعدہ کرکے کام کرواتے ہیں، جن میں سے بہت سے افراد کو اس دوران کیے گئے کام کی تنخواہ نہیں ملتی۔”
انہوں نے مزید کہا کہ "کچھ وزیٹرز کے ساتھ نوکری کی پیشکش کی گارنٹی کے ساتھ بدسلوکی کی جاتی ہے اور ان کے وزٹ ویزہ کی میعاد ختم ہونے کے بعد انہیں ملازمت چھوڑنے کے لیے کہا جاتا ہے۔ اس نئے قانون کے ذریعے ان خرابیوں کو نمایاں طور پر روکا جائے گا اور اس بات کو یقینی بنایا جائے گا کہ لیبر قوانین پر سختی سے عمل کیا جائے۔ اب اگر کوئی کمپنی قانون کی خلاف ورزی کرتی پائی گئی تو اسے سنگین نتائج اور قانونی کارروائی کا سامنا کرنا پڑے گا۔”
بی ایس اے احمد بن ہیزیم اینڈ ایسوسی ایٹس کے سینئر ایسوسی ایٹ، ہادیل حسین، نے وضاحت کی کہ "یہ ترامیم آجروں کے لیے سخت قوانین کا ایک نیا ماحول پیدا کرتی ہیں اور لیبر قانون کی زیادہ سے زیادہ تعمیل کا مطالبہ کرتی ہیں۔ جرمانے میں اس قدر اضافے سے لیبر قانون کی خلاف ورزیوں کے خلاف ایک مضبوط رکاوٹ کا کام کرے گا۔ ترامیم سے یہ واضح ہوتا ہے کہ لیبر ریگولیشنز کی خلاف ورزی کے سنگین نتائج برآمد ہوں گے، جس سے آجر کی جوابدہی میں بھی اضافہ ہوگا۔”
انہوں نے کہا کہ "چھوٹے روزگار کے دعوؤں اور ایم او ایچ آر ای کی شمولیت سے متعلق ترمیم سے ملازمین اور آجروں دونوں کے لیے زیادہ مؤثر، مساوی اور ہموار قانونی عمل کو یقینی بنایا جائے گا۔ تنازعات میں وزارت کا بہتر کردار اور کم قیمت والے دعوؤں کے فوری اور قابل عمل فیصلے یقینی بناتے ہیں کہ ملازمت کے تنازعات کو کم قانونی اخراجات کے ساتھ جلد حل کیا جا سکے۔”
